Mtanzania afungwa miaka 30 kwa kusafirisha ‘heroine’

RAIA mmoja wa Tanzania aliyekamatwa nchini Kenya akisafirisha dawa za kulevya aina ya ‘heroine’ zenye uzito wa kilo 10.2 zenye thamani ya shilingi milioni 30 amehukumiwa kutumikia kifungo cha miaka 30.

Mtanzania huyo ambaye anajulikana kwa jina la Hussein Masoud Eid pia amepigwa faini ya shilingi milioni 90 za Kenya na iwapo atashindwa kulipa fedha hizo atatumikia miaka mitano zaidi jela.

Hakimu mkaazi wa Mombasa, Edgar Kagoni alisema hukumu kali zitasaidia kuzuia mtu asishawishike kujihusisha na biashara ambayo imekuwa na athari mbaya kwa vijana wa Kenya.

“Ilivyokuwa kwamba mtuhumiwa anaonekana hakuwa peke yake kwa sababu alikuwa anapita njia, nitatoa hukumu kali siyo tu kumuadhibu kwa kukubali kutumika na wanaomiliki dawa hizo, lakini pia kuzuia watu wengine wanaoweza kushawishika kusafirisha dawa hizo”, alisema hakimu huyo.

Eid kupitia wakili wake Jared Magolo, aliomba kupunguziwa adhabu akisema mteja wake ni mgeni na alikuwa mbali na familia yake kwa kipindi kirefu. Hapo awali mwendesha mashtaka wa serikali alitaka mtuhumiwa apewe kifungo cha maisha.

Magolo alisema kuwa katika kipindi cha miaka mitatu mtuhumiwa alikuwa amefungwa na alikuwa amejirekebisha na yuko tayari kuungana na jamii iwapo ataachiwa huru.

Kwa kuwa amejirekebisha, Magolo amesema mteja wake anahitaji kwenda kuungana na jamii kuwasimamia watoto wake wanne.

Wakili aliiomba mahakama kutowaingiza watoto wadogo wa mshtakiwa katika adhabu hiyo kwa kumfunga baba yao ambaye hawajamuona kwa muda wa miaka mitatu.

Hakimu Kagoni hata hivyo alisema alikuwa ametumia uamuzi wake wa kutompa mshtakiwa kifungo cha maisha ingawaje sheria inatoa nafasi ya kifungo hicho kwa kosa hilo.

Eid alifunguliwa mashtaka pamoja na Othmani Hamisi Tinje na Mwenda Hamisi ambao waliachiwa baada ya mahakama kukosa ushahidi wa kutosha unaowahusisha na kosa hilo.

Watu hao Masoud, Tinje na Hamisi walikanusha kutenda kosa hilo Machi 16, 2019 katika hoteli ya Regency Park mjini Mombasa.

Wakati wakiwakamata watuhumiwa hao, polisi walikamata dola za Marekani 6,100, sarafu za Madagascar, Tanzania na Umoja wa Falme za Kiarabu UAE.

CHANZO: ZANZIBAR LEO

error: Content is protected !!